Sólon er mættur

Sólon Íslandus eftir Davíð Stefánsson frá Fagraskógi er kvöldsaga Ríkisútvarpsins í sumar. Sagan af umrenningnum Sölva Helgasyni. Fyrsti sögustundin var í gærkvöldi, dásamlegur upplestur Þorsteins Ö. Stephensen frá árinu 1957. Man reyndar eftir því þegar lesturinn var endurfluttur, það mun hafa verið 1980. Fáar sögur hafa haft jafn mikil áhrif á mig; raunar segi ég alltaf að Sólon og Sölvi hafi mótað mig fyrir lífstíð, enda hef ég jafnan reynt að fara eigin leiðir í lífinu sé þess kostur.


Barnlausir þingmenn!

Bloggarar sem aðrir eiga að stilla orðum sínu í hóf. Fari fólk áfram með illihaldslausar og fúkyrtar yfirlýsingar dæmir það  sig sjálfa úr leik, með þeim hætti að sá sem fyrir spjótalögunum verður stækkar af öllu saman. En ég staldra samt við þegar Pétur Blöndal nefnir börn þingmanna í sambandi við þann óhróður sem stundum gengur yfir foreldra þeirra. Fjöldinn allur af fólki á ekki börn. Er í lagi að láta skít og skammir vaða yfir viðkomandi, sakir barnleysis?

 


mbl.is Óbilgjarnt blogg í garð þingmanna
Tilkynna um óviðeigandi tengingu við frétt

Hernámsstjórnin!

Sagan endurtekur sig alltaf. Þann 10. maí árið 1940 hernámu Bretar Íslands og nú, þennan sama dag, 69 árum síðar tekur ríkisstjórn vinstri flokkanna við völdum. Fer því vel á að nefna hana Hernámsstjórnina! Gild rök má að því leiða að hernámið á sínum tíma hafi verið mesta gæfa þjóðarinnar fyrr og síðar. Þá fyrst sáu Íslendingar við peninga og landið komst loksins inn í nútíma vestrænna þjóðar, auk heldur sem enginn hugsar þá hugsun til enda ef Þjóðverjar hefðu hernumið landið okkar góða. Og eins og bresku dátarnir á sínum tíma vörðu landið þarf ný ríkisstjórn að gera hið sama og koma okkur á rétt ról afur. Hvort það tekst efast ég um - mér finnst engin gæfusól yfir  stjórninni nýju.
mbl.is Ný ríkisstjórn
Tilkynna um óviðeigandi tengingu við frétt

Mynd af Magnúsi - á góðri stundu með ÓRG!

Merkilegt hvað myndir geta sagt mikla sögu. Tók þessa mynd af Magnúsi Þorsteinssyni og forsetahjónunum í London snemma árs 2005. Þarf einhverjar frekari skýringar? Nú verður hláturinn grátur. Veröld sem var ...

 

Picture 261


mbl.is Fallist á gjaldþrotakröfu
Tilkynna um óviðeigandi tengingu við frétt

Sólskinsviðtöl og vandinn mikli

Á stóru skilti þar sem er ekið er inn í Reykjanesbæ, heimabæ Svanbergs Hjelms, stendur stórum stöfum hve mikið íbúum þar hefur fjölgað á undanförnum árum. Sömuleiðis hefur oft mátt lesa "sólskinsviðtöl" í fjölmiðlum við Árna Sigfússon bæjarstjóra þeirra Reyknesinga um mikla uppbyggingu í sveitarfélaginu og möguleika á að sá vöxtur héldist til lengri tíma. Allt virðist þetta hafa verið á sandi byggt. Reykjanesbær er skuldugur upp fyrir haus rétt eins og fjölmargir íbúanna sem slóu lán meðal annars vegna íbúðakaupa. Reyndar skiptir landafræði engu máli í þessu sambandi. Kaldur veruleikinn er sá að þúsundir fjölskyldna um allt land eru að komast á vonarvöl vegna atvinnuleysis, okurlána og offjárfestinga. Þetta setur sveitarfélög, bæði Reykjanesbæ og önnur, í hræðilegan vanda og fréttir að undanförnu benda raunar til þess að þeim verði um megn að veita þá félagslegu aðstoð sem íbúarnir eiga tilkall til, meðal annars samkvæmt stjórnarskrá.

 


mbl.is Kikna undan skuldum
Tilkynna um óviðeigandi tengingu við frétt

Í olíuna úr öskustónni

Hringekjan er komin á fullan snúning. Þjóðin er í öskustó útrásarævintýris bankanna en starfsemi þeirra átti að vera ný stoð undir þjóðarbúskapinn. Sá atvinnuvegur brást með hrapalegum hætti. Ætli olíuævintýrið verði svipað, ef það kemst einhverntíma fyrir vind? Merkilegt, að stjórnvöld ætla alltaf að frelsa þjóðina út úr ánauð með patenlausnum í atvinnumálum; svo sem skuttogaravæðingu, loðdýraeldi, laxarækt, fjarvinnslu, líftækniðnaði, fjármálastarfsemi og þannig mætti áfram telja. Og svo velti ég fyrir mér, af hverju það er eitthvað sérstakt keppikefli að íbúum fjölgi á NA-horni landsins. Fólk flytur einfaldlega þangað þar sem það hefur atvinnu og finnur hamingjuna. Er vandamál þótt fólk vilji eiga heima á SV-horni landsins eða sérstakt fréttaefni og óskaplega gleðilegt þótt íbúum kunnu að fjölda við Bakkaflóa og Þisilfjörð.

 

 


mbl.is Íbúum fjölgi með olíunni
Tilkynna um óviðeigandi tengingu við frétt

Leiðari liðins tíma

Það gat ekki annað verið. Í bloggpistli á þesum vettvangi í gær lagði ég út frá grein Gylfa Arnbjörnssonar en í umræddum leiðara sagði að atvinnuleysi á Íslandi væri sáralítið. Þau ummæli þóttu mér stórundarleg. Víst er að fyrir ári síðan höfðu flestir atvinnu og ekki er ofsögum sagt að þá höfum við lifað í allt öðru þjóðfélagi. Nú komið á daginn hvers kyns var, þetta var leiðari liðins tíma. Ég hef fullan skilning á þessu; hef í mínu útgáfustússi nokkrum sinnum lent í mistökum sambærilegum þessum.
mbl.is Árs gamalt ávarp
Tilkynna um óviðeigandi tengingu við frétt

Sáralítið atvinnuleysi!!!

Í Vinnunni, málgagni ASÍ, sem fylgdi Fréttablaðinu í dag, er leiðari eftir Gylfa Arnbjörnsson forseta ASÍ. Hann tæpir á mörgu í grein sinni, fjallar um kjarasamninga, Evrópumál og fleira. Segir í niðurlagsorðum að þótt dregið hafi ský fyrir sólu séu lífskjör Íslendinga með því besta sem þekktist og "... atvinnuleysi sáralítið," eins og þar stendur. Hver lítur sínum augum á silfrið. Í fréttunum áðan var rætt um að 18 þúsund manns væru án atvinnu; fólk sem á illmögulegt að sjá sér og sínum farborða. Alþýðuleiðtoginn Gylfi virðist því fullkomlega æðrulaus - enda óþarfi að hafa áhyggjur þegar atvinnuleysi er sáralítið.

 


mbl.is Nýjan sáttmála um stöðugleika
Tilkynna um óviðeigandi tengingu við frétt

Fundir út um allan bæ!

Þótt engir formlegar viðræður um myndun ríkisstjórnar séu í dag þarf enginn að segja mér en að út um allan bæ séu foringjar og fótgönguliðar VG og Samfylkingar á fundum þar sem lagt er á ráðin. Stór mál eru sjaldnast til lykta leidd við samningaborð heldur í kaffispjalli eða annarsstaðar þar sem aðstæður eru óformlegar og óþvingaðar. Hafa stjórnmálafréttamenn enga góða "lekaliða" sem geta sagt okkur frá því hver staða viðræðna sé? Af hverju taka fréttamenn ekki rúnt um bæinn og kanna hvar fundir séu í gangi. Hringja heim í þingmenn eða ráðherra og svo framvegis. Hringja í leyninúmerin hjá þessu liði og athuga hvað sé að gerast. Búa til ágreining milli stjórnarflokkanna; kalla fram umræðu um málefni. Ekkert af þessu er gert. Stjórnarmyndunarviðræður eru stórmál og fregna af þeim verður að afla með öðrum leiðum en blaðamaður sé í einföldu löggutékki, eins og sagt er á ritstjórnum.

 

 


mbl.is Hlé á viðræðum í dag
Tilkynna um óviðeigandi tengingu við frétt

Skörungur af Skipaskaga

Alþýðuleiðtoginn á Akranesi er vel meinandi, en mikið ofsalega held ég að við núverandi aðstæður sé erfitt að koma umtalsverðri hækkun lægstu launa í gegn. Fyrirtækin í landinu eiga í mesta basli með að greiða sínu fólki laun um hver mánaðamót og við slíkar kringumstæður er erfitt að sækja á um hækkanir. Metnaðarmál verkalýðshreyfingarinnar í dag ætti fremur að vera að tryggja öllum atvinnu. Enginn þarf að velkjast í vafa um að atvinnuleysið er þjóðarböl. Hvað varðar forstjóra lífeyrissjóða, sem eru svo frekir á fóðrum að laun þurfa 30 millj. kr. í laun á mánuði, þá skil ég ekki af hverju þarf að flytja sérstaka ræðu um slíkt. Er ekki tiltölulega einfalt ráð að reka þessa þurftafreku forstjóra og ráða í þeirra stað einhverja á ögn lægri launum. Allt í þessari ræðu skörungsins af Skipaskaga virðist þessu marki brennt; talað er fyrir stíl og stemmningu dagsins og málin eru ekki hugsuð í botn.


mbl.is „Sannleikur grundvallaratriði"
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband